Zpět

1376 (13.3.) CDM XI/30 str. 28

Ego Petrus de Habrowan notumfacio tenore presencium universis. Quod a serenissimo principe et domino, domino Jodoco marchione Moravie, domino meo gracioso, in recompensam serviciorum per me sibi exhibitorum fideliter, bona sua videlicet in villa Habrowan municionem, duas araturas, decemnovem laneos, undecim curticulas, unam tabernam, ortum pomerium, duas piscinas, In Rauseins unam marcam census et de Companya tres fertones novem grossos annui census cum omnibus et singulis eorum pertinenciis, silvis, rubetis, pratis, pascuis, rivis, aquis, piscacionibus, agris cultis et incultis, metis, limitibus et graniciis, juribus, utilitatibus, pleno dominio, proventibus, fructibus et obvencionibus universis, quibuscunque nominibus censeantur, pro me et meis masculinis tantum heredibus in verum feudum suscepi. Promittens cum predictis meis heredibus bona nostra fide, fraudis semota dolositate, de predictis municione, bonis et eorum pertinenciis universis prefato domino marchioni, heredibus et successoribus suis, marchionibus Moravie, servire, obedire, intendere, obsequi fideliter et parere sicut veri feudales suis naturalibus veris et legittimis dominis serviunt, obediunt, intendunt, obescuntur fideliter et parent, bonum eorum prosequendo et malum precavendo in omni loco publice et occulte. Et quandocunque necesse fuerit, sive quociens requisiti fuerimus per dictum marchionem, heredes et cuccessores ipsius marchiones Moravie, tunc cum una galea ego vel heredes mei predicti personaliter aut, si legittimis nostri negociis pro tunc occupati fuerimus, per aliam idoneam personam nobis condicione similem debebimus et tenebimur apte et decenter deservire.
In cuius rei testimonium sigilla meum et discreti viri domini Nicolai fratris mei, plebani in Wazan et nobilium virorum dominorum Johannis senioris de Mezirziecz et Petri Hecht de Rossicz, predicti domini marchionis feudalium, presentibus sunt appensa.
Datum Spilberg quinta feria post dominicam Reminiscere anno domini millesimo trecentesimo septuagesimo sexto.

česky
obsah
seznam příloh